நெல்லையின் மறக்க முடியாத ஆட்சியர்.!

   

    நாள் தோறும் நெல்லைக்குள் சீறிப்பாயும் நவீன ரக மாநகரப் பேருந்துகளின் பெயர் பலகைகள் சுத்த தமிழில் எழுதப் பட்டிருப்பதை கவனித்திருக்கிறீர்களா.?

ஜங்ஷனை - நெல்லை சந்திப்பு என்றும்,
ஐகிரவுண்டை - பாளை மேட்டுதிடல் என்றும்
டவுணை - நெல்லை நகரம் என்றும் எழுத வைத்த அந்த நபர் யார் தெரியுமா.?

1998 முதல் 2001 வரை நெல்லையில் மாவட்ட ஆட்சியராக இருந்த திரு. தனவேல்  I.A.S தான்.

தனித்துவமான திருநெல்வேலி:

தமிழ்நாடு அரசாங்க வட்டாரத்தில் திருநெல்வேலி மாவட்டத்திற்கு என்று ஒரு தனி முக்கியத்துவம் உண்டு. ஐந்து வகையான நிலப்பரப்பு, பலதரப்பட்ட மக்கள், விநோதமான பிரச்னைகள் என்று பல அம்சங்கள் நம் மாவட்டத்திற்கே உரித்தான விஷயங்கள்.

எனவே திருநெல்வேலிக்கு திறமையான அதிகாரிகளே ஆட்சியர்களாக நியமிக்கப்படுவார்கள். அவ்வாறு நியமிக்கப்படுபவர்கள் சிறப்பாக செயல்பட்டால் அவர்கள் தமிழ்நாடு அரசின் மிக உயர்ந்த பதவிகளுக்கும் சென்றுவிடுவார்கள். அதற்கு எடுத்துக்காட்டாக பல அதிகாரிகள் உள்ளனர்.

திருநெல்வேலியை திருத்தியவர்:

அவர்களில் மிக முக்கியமானவர் முன்னாள் நெல்லை ஆட்சியர் திரு. தனவேல். அவரின் பணிகாலத்தில் பல முன்னெடுப்புகள் நம் நெல்லையில் எடுக்கப்பட்டிருக்கின்றன.

2000-ம் ஆண்டு இவர் கொண்டுவந்த "நெல்லையை பசுமையாக்கும் திட்டத்தின்" கீழ் நெல்லை மாநகரில் நூற்றுக்கணக்கில் மரக்கன்றுகள் நடப்பட்டு பரமாரிக்கப்பட்டன.

நெல்லையை அழகுபடுத்தும் திட்டம் என்ற திட்டத்தை தொடங்கி நெல்லை சாலைகளில் அலங்கார ரவுண்டானாக்களையும் அமைத்திருக்கிறார்.

மிக முக்கியமாக திலி-ஜங்ஷன், ஹைகிரவுண்ட், நெல்லை டவுண் என்று பெயர் போட்டு இயங்கிய மாநகர பேருந்துகளை திருத்தி நெல்லை சந்திப்பு பாளை. மேட்டுதிடல் என தனித் தமிழாக்கி நடைமுறைப்படுத்தியுள்ளார்.

இப்படி அவர் பதித்த தடங்கள் நம்  நெல்லையின் பல இடங்களில் இன்று அழகாக தெரிந்து கொண்டிருக்கின்றன.

தற்போது இவரை தமிழ்நாடு அரசின் சமூகநீதி கண்காணிப்புக் குழு உறுப்பினராக நியமித்துள்ளார் முதல்வர் ஸ்டாலின்.!