பாரம்பரியம் குறையாத வடக்குரத வீதி.!

ஒவ்வொரு நகரிலும் புகழ் பெற்ற வணிக நிறுவனங்கள் நிரம்பிய கடை வீதிகள் பல உண்டு. பண்டிகை காலங்களிலும், திருவிழா சமயத்திலும் அங்கு குழுமும் கூட்டம் அந்த வீதிகளையே திருவிழா களங்களாக மாற்றிவிடும். தமிழ்நாட்டில் தலைநகர் சென்னையில் உள்ள ரங்கநாதன் தெரு அத்தகைய சிறப்பு வாய்ந்த பெருவீதி. மதுரையில் விளக்குத்தூண் பகுதியும் பண்டிகைகால பண்டங்கள் வாங்க ஏற்ற இடம். கோவையில் ஒப்பணக்கார வீதி வணிக பெருநிறுவனங்கள் வீற்றிருக்கும் இடமாகும்.  அந்த வரிசையில் நம் திருநெல்வேலியில் நெல்லையப்பர் கோவிலின் வடக்கு ரத வீதி நமக்கு ஏற்ற கடை வீதியாக திகழ்கிறது.

மேற்கண்ட ஊர்களில் உள்ள கடை வீதிகளை விட மிகப் பழமையானது நம் வடக்கு ரத வீதி.  நெல்லையப்பர் கோவில் கட்டியே 2000 வருடங்கள் ஆகும் போது இந்த வீதியின் வயது அதற்கும் முந்தியதாக இருக்கவே வாய்ப்புள்ளது.

மதுரைக்கு தெற்கே வாழும் மக்களுக்கு சீமைத் துணிகளை விற்கும் கடைகள் இங்கு தான் காலங்காலமாக இருந்து வந்துள்ளது. முன்னொரு காலத்தில் திருநெல்வேலி என்றால் அது களைகட்டும் நான்கு ரதிகள் தான் என்ற நிலை இருந்தது. நெல்லையப்பர் கோவில் வாசலில் தான் திருநெல்வேலி பஸ் நிலையமும் செயல்பட்டு வந்துள்ளது.

பாரம்பரியமிக்க வீதி:

இந்த வீதி நெல்லை மக்களுக்கு மட்டும் பயன்பட்ட இடம் அல்ல.!  பல உழைப்பாளிகளை மாபெரும் தொழிலதிபர்களாக மாற்றிய ராசியான வீதி. ஆரெம்கேவி கடை முதன்முதலில் கிளை தொடங்கியது இங்கு தான்.! பின்னர் படிப்படியாய் வளர்ந்த அது இன்று அடைந்துள்ள உயரம் மிகவும் பிரமிப்பானது.
அதேப் போல ஸ்ரீவில்லிப்புத்தூரில் ஆரம்பிக்கப்பட்ட போத்தீஸ் தனது இரண்டாவது கிளையை இங்கு தான் அமைத்தது. அதுவும் இன்று தென்னிந்தியாவின் முக்கிய ஜவுளி கடைகளுள் ஒன்று.!

நம் வடக்கு ரத வீதியில் பெரிய பெரிய கடைகள் வியாபித்திருந்தாலும் பண்டிகை காலங்களில் முளைக்கும் சிறு சிறு கடைகள் வடக்கு ரதவீதியின் அழகை பெருமளவு கூட்டிவிடும். தீபாவளி என்றால் சிறிய துணி கடைகள்.. பொங்கல் என்றால்  மஞ்சள்,காய்கறி கடைகள், தேரோட்டம் என்றால் விளையாட்டு, ஆபரணக் கடைகள் என காலத்திற்கேற்ப மாறும் கடைவீதி இது.

குறையாத பாரம்பரியம்:

இங்கிருந்த பெரு நிறுவனங்களுள் சில வண்ணார்பேட்டைக்கு தனது கடைகளை மாற்றியிருந்தாலும் தொடங்கிய இடத்தில் சிறிய கடைகளையாவது வைத்து பராமரித்து வருகின்றன. அந்த லிஸ்ட்டில் சமீபத்தில் சோனாவும் இணைந்தது.

என்ன தான் நம்ம திருநெல்வேவவிக்கு வண்ணார்பேட்டை பைபாஸ் ரோடு பஜார் வந்தாலும் கால் நடையாய் நடந்து கடைக் கடையாய் ஏறி இறங்கி வாங்கும் டவுண் துணிமணிகளுக்கும் அதுக்கு பிறகு வாயாற விருந்தளிக்கும் விசாக பவன் முதலிய ஹோட்டல்களுக்கும் உள்ள மவுசே தனிதான்.! பாரம்பரியமிக்க வடக்கு ரதி வீதின்னு சும்மாவா சொல்றாங்க.?❤