திருநெல்வேலியின் பென்னிகுவிக்.!

முல்லைப்பெரியாறு அணையை கட்டி மதுரை சுற்றுவட்டார கிராமங்களை பாதுகாத்தவர் திரு.பென்னிகுவிக். வெளிநாட்டில் இருந்து வந்து தமிழகத்தின் வாழ்வு காத்த அவரை தென்மாவட்டங்கள் என்றுமே மறவாது.
அப்படி செங்கல்பட்டில் இருந்து வந்து நம் நெல்லை மக்களின் பெருந்தேவையை 1860ம் ஆண்டு தீர்த்து வைத்தவர் திரு. சுலோச்சனார்.

அன்று திருநெல்வேலியும் பாளையங்கோட்டையும் பெருந்தொலைவில் இருந்தன. அன்று சீமையாக திகழ்ந்த நெல்லைக்கு பாளை பகுதி மக்கள் வரவேண்டுமெனில் ஆற்றை கடந்தே வர வேண்டும். வசதி உள்ளவர்கள் படகை பயன்படுத்தியுள்ளனர். இந்த நிலைமை வெகு நாட்களாக நிலவி வந்துள்ளது. நாளடைவில் இரு நகரங்களும் வளர ஆரம்பித்ததும் நதியை கடக்க மக்கள் பெரும் சிரமப்பட்டுள்ளனர். இதை ஆங்கிலேயர்கள் கண்டும் காணாமல் இருந்து விட்டார்கள். பாலம் கட்டவேண்டும் என மக்கள் கோரிக்கை விடுத்த போதும் ஆங்கிலேய கலெக்டர்கள் அதை ஏற்கவேயில்லை. பெரும் செலவு செய்ய ஆங்கிலேய அரசு அப்போது பெரிதும் யோசித்தது. இந்த நிலையில் நெல்லை ஜில்லா கலெக்டர் தாம்சனின் சிரஸ்தராக பணியாற்றிய சுலோச்சனர் இந்த பிரச்னையை கையிலெடுத்து தீர்வு காண முயன்றார். அதற்காக தனது மனைவியின் உதவியோடு பெரும் தொகையை திரட்டி தனது சொந்த செலவில் (50லட்சம்- இப்போதைய மதிப்பில் 10 கோடி இருக்குமாம்.!) அதை கட்டி முடித்தார். அதுவும் அந்த பாலம் லண்டன் தேம்ஸ் நதி பாலத்தை போன்றே பிரம்மாண்டமாக இருக்க வேண்டும் என விரும்பி அவ்வாறே கட்டி முடித்தார்.

அவரது அன்றைய தன்னலமற்ற சேவை, ஆற்று வெள்ளத்திலிருந்து பல மக்களை காத்திருக்கிறது. நெல்லை மாநகரமும் கிழக்கு-மேற்காக விரிவடைய ஆரம்பித்தது. 174 ஆண்டுகளாக பல்வேறு சீரமைப்புகள் செய்யப்பட்டு இன்று அகலமாக நீண்டு நிற்கும் இந்த பாலம் நம் நெல்லையின் தவிர்க்க முடியாத அடையாளமாகியுள்ளது. பாய்ந்தோடிய தாமிரபரணியால் பிரிந்து கிடந்த நெல்லையை பாளையோடு இணைத்து வைத்த திரு.சுலோச்சனார் நம் பாரம்பரியமிக்க திருநெல்வேலியின் பென்னிகுவிக்காக என்றென்றும் திகழ்வார்.