தூத்துக்குடியை இனியும் சீண்டாதீர்கள்.!

தூத்துக்குடியின் மிகப் பெரிய ஆலைகளுள் ஒன்றான ஸ்டெர்லைட்டை எதிர்த்து மக்கள் போராடியதில் 13 பேர் கொல்லப்பட்ட நிகழ்வு சர்வதேச அளவில் அதிர்வலைகளை ஏற்படுத்தியது. தங்கள் நிலத்தையும், காற்றையும் விஷத்தில் இருந்து விடுதலை பெற வைக்க தூத்துக்குடி மக்கள் திரண்டெழுந்தனர். இவ்வாறு தூத்துக்குடி மக்கள் திரண்டெழுவது இது முதல் முறையல்ல.

நாட்டுக்கே விடுதலை தந்த பூமி:

இந்திய நிலப்பரப்பு முழுவதையும் தங்கள் கட்டுப்பாட்டில் கொண்டுவந்த வெள்ளைக்காரன்களுக்கு சிம்ம சொப்பனமாக திகழ்ந்தது அன்றைய நெல்லையும் தூத்துக்குடியும். வ.உ.சி ஆங்கிலேய கப்பல்படைக்கு சவால் விட்டு சுதேசி கப்பலை விட்ட போது மிரண்டு போனான் பிரிட்டிஷ் காரன். பாரதி தன் கவிதைகளால் சாட்டையை சுழற்ற, சுப்ரமணிய சிவா முதலியவர்கள் தணியாத வேட்கையோடு சுதந்திர போரில் ஈடுபட்டிருந்நனர். அதற்கு முன்பே கட்டபொம்மன் தூக்கு கயிறுக்கு முத்தமிட்டு மாண்டது இந்த மண்ணில் தான் நிகழ்ந்திருந்தது. இப்படி தங்களின் விடுதலைக்காக குரல் கொடுத்து போரிட்டு ஒட்டு மொத்தமாக இந்திய நாட்டிற்கே விடுதலை தந்த மண் தூத்துக்குடி. ஆனால், தற்போது பல்வேறு உள்நாட்டு அரசியல் சூழ்ச்சிகளால் ஆங்கிலேய ஆலையிடம் அடிமைப்பட்டு கிடக்கிறது இந்த மண். பல்வேறு விதமான நோய்களுக்கு தோற்றுவாயாக ஸ்டெர்லைட் இருப்பதாக 20 ஆண்டுகளாக மக்கள் கூக்குரலிட்டு வந்தார்கள். அதை யாருமே கேட்கவில்லை. கேட்டாலும் ஆலையை நிரந்திரமாக மூட முன்வரவில்லை. இனியும் பொறுத்துக் கொண்டிருக் முடியாது என காலவரையற்ற அறப்போராட்டத்தை கையிலெடுத்து சீறியது முத்துமாநகரம். போராட்டம் 99 நாட்களை கடந்து 100 வது நாளில் விஸ்வரூபம் எடுத்தது. இத்தனை நாட்களாக அமைதி காத்த மக்கள் பீறிட்டு எழுந்தார்கள். அரசாங்கமோ அவர்களின் உணர்வுகளை அணுகத் தெரியாமல், அவர்களை வன்முறை கண்ணோட்டத்தோடு கண்டு தடியடி செய்து கலைக்க முற்பட்டனர். அரசாங்கத்தின் இந்த அநீதியை காண சகிக்காத முத்துநகர மக்கள் வெகுண்டெழுந்து அசைவற்று இருக்கும் அதிகார பீடங்களை சூறையாடும் நிலைக்கு துரதிருஷ்டவசாக தள்ளப்பட்டனர். வீறுகொண்டெழும்பிய மக்கள் கூட்டத்திற்கு துப்பாக்கி குண்டுகளே நீதியாக கிடைத்தது. 13 பேர் மாண்டுள்ளார்கள். நூற்றுக்கணக்கானோர் அவதியடைந்துள்ளனர். அரசாங்கம் நிவாரணத்தை வழங்கியிருக்கிறது. தூப்பாக்கிச் சூட்டிற்கு நியாய வாதங்களை அரசு எடுத்துவைக்கிறது.
எனினும் பலியான அப்பாவி மக்களின் குடும்பங்களை இவைகள் எந்த விதித்திலும் ஆற்றுபடுத்தாது. மக்கள் வேண்டியது ஆலை மூடல். ஆனால் அரசாங்கமோ, மின்சாரத்தை துண்டித்து விட்டு ஆலையை மூடிவிடுவோம் என்கிறார்கள். பிரச்னை நீதி மன்றத்தில் இருப்பதால் ஆலை திறக்கப்படுவதற்கும் வாய்ப்புகள் உண்டு. எனவே ஆலையை மூட வேண்டும் என்ற மக்கள் கோரிக்கையை அரசு உடனடியாக செய்யாவிட்டால், தூத்துக்குடி அதை எதிர்த்து மீண்டும் சீறும். உயிர்த் தியாகம் செய்யத் துணிந்த தூத்துக்குடி அடுத்த கட்டத்திற்கு செல்லவும் தயங்காது என்பதை ஆட்சியாளர்கள் நினைவில்வைத்துக்கொள்ள வேண்டும். ஆங்கிலேயனை விரட்டியடித்த மக்களுக்கு இந்த ஆலையிடம் இருந்து விடுதலை வாங்கித் தர வேண்டும். இல்லையெனில் அம்மக்களின் சீற்றம் இன்னும் அதிகமாகுமே தவிர அஸ்தமிக்காது.