அன்றைய திருநெல்வேலி மாவட்டத்தில் விவசாய நிலங்களற்ற மக்கள் பிழைப்பு தேடி பம்பாய் மாநகரில் தஞ்சம் புகுந்தனர். அவர்களுக்கு பின்னர் அவர்களின் சொந்த பந்தங்களும் பம்பாய்க்கு சென்று உருவாக்கியதே இன்றைய தாராவி. ஆசியாவின் மிகப்பெரிய குடிசை பகுதியான தாராவியில் இன்றும் தமிழர்களே பெரும்பான்மையாக வசித்துவருகின்றனர். தாராவி இன்றைய மும்பையின் மத்திய பகுதியில் அமைந்துள்ளதால் அந்த இடத்தின் மதிப்பு பல ஆயிரம் மடங்காக அதிகரித்துள்ளது.
காலங்காலமாக தமிழர்களே அந்த இடத்தை புழங்கி வந்திருந்தாலும், அவர்களை அகற்ற பம்பாய் தாதாக்கள் எடுத்த முயற்சிகள் கொஞ்சநஞ்சமல்ல. அப்படி எடுத்த முயற்சிகளுக்கு கடும் சவாலாக நம் திருநெல்வேலி தமிழ் மக்கள் இருந்துள்ளனர். பல நேரங்களில் பம்பாய் தாதாக்களை நம் நெல்லையை சேர்ந்த மக்கள் அவர்களின் வழியிலேயே விரட்டியடித்த கதைகளை இப்போதும் திருநெல்வேலி மாவட்ட கிராமங்களில் வசிக்கும் பம்பாய் குடும்பத்தினரிடம் கேட்கலாம். காலா என்ற பெயரோடு இந்த படத்தில் நடித்துள்ள ரஜினி, ஒரு பம்பாய் பெரும்புள்ளிக்கு கடும் சவாலாய் விளங்கும் திருநெல்வேலிகாரராய் வருகிறார். அப்போதே தங்களின் வாழ்வாதாரத்தை தேடி பல ஆயிரம் கி.மீ கடந்து சென்ற நம் திருநெல்வேலி சொந்தங்களின் வீர வரலாற்றை காலா பேச இருக்கிறது. எதிர்பார்ப்போம்.!
Comments
Post a Comment